டோண்டு சார்- இன்னும் வாழ்ந்திருக்கலாம்

டோண்டு அவர்களை சமீபத்தில் (இந்த வார்த்தை என்னைப் போன்ற மூத்தபதிவர்களுக்கு எங்கள் வாழ்நாள் முழுக்க டோண்டு நினைக்க வைத்து விடும். )ஐந்துமாதங்களுக்கு முன்பு துளசி வீட்டு விசேஷத்தில் சந்தித்தேன், துளசிக்கு அவரை அடையாளம் தெரியவில்லை, டோண்டு என்றதும், என்ன ஆச்சு இவருக்கு என்று மாய்ந்துப் போனார். என்ன சார் உடம்புக்கு என்றதும் கேன்சர்! ஆபரேஷன் ஆயாச்சு, நான்கு லட்சம் ரூபாய் இதுவரை செலவாகியிருக்கு, ஆனால் ஆபரேஷனுக்கு பிறகான ரேடியேஷனும், கீமோதொரபியும் கொடுமையாய் இருக்கு என்றார் அவரால் அதிகம் பேச முடியவில்லை. கண்களை மூடிக் கொண்டு அமர்ந்திருந்தவர், “ உங்க தைரியத்தை பாராட்டுகிறேன்” என்று ஆரம்பித்தார். நான் கொஞ்சம் முழிக்க, “ போலி டோண்டு பிரச்சனையில் கடைசியில் அவன் மன்னிப்பு கேட்டதும், மன்னிக்க மாட்டேன் என்றீர்களே அதைச் சொன்னேன் " என்றார். சட்டென்று மனசுக்குள் ஒரு ஆயாசம் . எத்தனை வருஷம் ஆச்சு, இன்னும் அந்த குப்பைகளை மனசில் போட்டு உழப்பிக் கொண்டு இருக்கிறாரே என்று தோன்றியது. அன்றைய மனநிலையில்,” சிலவற்றை என்றைக்கும் மன்னிக்க முடியாது என்று டோண்டு பதிவில் பதில் சொல்லியிருந்தேனாம். எனக்கு அவர் சொல்லும்பொழுதுகூட நினைவுக்கு வரவில்லை. அந்த ஆபாச தாக்குதலில் பெரும்பாலான பதிவர்கள் பாதிக்கப்பட்டனர். நானும் உட்பட அன்றைய பெண் பதிவர்கள் பெயரில் ஆபாச பதிவுகள் தொடங்கப்பட்டன. ஓரிரு பெண்பதிவர்கள் இணையத்தில் இருந்து விலகினர். மற்றவர்கள் வேதனைப் பட்டோமே தவிர, அதை பெரியதாய் கண்டுக் கொள்ளவில்லை. ஆனால் டோண்டு சாரால் அதை மறக்கமுடியவில்லை. இத்தனை வருடம் கழித்து என்னிடம் அதே விஷயத்தைஆரம்பிக்கிறார் என்றால், எவ்வளவு மனசில் போட்டு குழப்பிக் கொண்டு இருந்திருக்க வேண்டும்? ஓவர் ஸ்ரெஸ் புற்று நோய்க்கு ஒரு காரணமாக சொல்லுகிறார்கள். அறுபதுகளில் இருந்தவருக்கு மரணம் சீக்கிரம்தான். பல விஷயங்களை போகிற போக்கில் , தனக்கு சரி என்று தோன்றுவதை பட்டவர்த்தமாய் சொல்லிக் கொண்டு இருந்தவர், விவாதங்களுக்கு சளைக்காதவர், தடம் மாறினால் போடா ஜாட்டன் என்று சொல்லியதை இந்த விஷயத்திலும் மனப்பூர்வமாய் சொல்லியிருந்தால், இன்னும் வாழ்ந்திருக்கலாமோ என்று மனசு அங்கலாய்க்கிறது. மனித மனம் விசித்திரமானது, தமிழ் இணைய வாசகர் வட்டம் உங்களை மிகவும் மிஸ் பண்ணுகிறது டோண்டு சார் :-(